આજના ડિજિટલ અને સોશિયલ મીડિયાના યુગમાં લગ્ન જાણે ફોટોશૂટ, ડેસ્ટિનેશન વેડિંગ અને મોંઘી ગાડીઓની રેસ બની ગયાં છે. ફિલ્મો અને સિરિયલોએ પ્રેમ અને લગ્નજીવનનું એવું સ્વર્ગીય ચિત્ર ઊભું કર્યું છે, જ્યાં ક્યારેય કરિયાણાનાં બિલ નથી આવતાં, ક્રેડિટ કાર્ડના હપ્તા નથી ભરવા પડતા અને સાસુ-વહુ વચ્ચે શાકમાં મરચું ઓછું-વધારે થવા પર ચર્ચા પણ નથી થતી!

પરંતુ વાસ્તવિક જીવન આનાથી તદ્દન અલગ છે. સાત ફેરા ફરતી વખતે અગ્નિની સાક્ષીએ જે વચનો આપવામાં આવે છે, તેનો સાચો અર્થ મંડપની બહાર નીકળ્યા પછી જ સમજાય છે.

“સાત ફેરા, સોળ આની સત્ય” કોઈ તત્ત્વજ્ઞાન કે ઉપદેશોનો ગ્રંથ નથી. આ પુસ્તક જમીન પર જીવાતા સંબંધોનું વાસ્તવિક અને હસતું-રમતું ‘Reality Check’ છે.

કોલેજના પ્રેમથી શરૂ થતી કોફી શોપની મુલાકાતો, સગાઈ વખતે મોબાઇલ માગવાની આધુનિક ફેશન, પાણેતર અને ઘરચોળાનું બજેટ, પ્રથમ રાત્રિ સાથે જોડાયેલા ભ્રમો, સંસારનું અર્થશાસ્ત્ર, સાસરું અને પિયર વચ્ચેનું સંતુલન, માતૃત્વની દિવ્ય વેદના તથા કાયદાકીય વાસ્તવિકતાઓ સુધીની આ સફર તમને જીવનનો એક સાચો અરીસો બતાવશે.

જો આ પુસ્તક વાંચીને તમારા ચહેરા પર સ્મિત રેલાય, મનમાં કોઈ વિચાર જન્મે અને જીવનસાથી સાથેનો સંબંધ થોડો વધુ મજબૂત બને, તો મારી આ લેખનયાત્રા સાર્થક થઈ ગણાશે.